حلويات الصابلي

صابلي بالنوكا

  صابلي بالنوكا وبمذاق البراليني

مقادير صابلي بالنوكا :

100 غ الزبدة الحيوانية ربع كاس زايد شوية سنيدة معلقة الزيت جوج معالق كبار البراليني لي ما عندوش يدير جوج معالق بودرة اللوز بقشورو بيضة قبصة الملح كنخدم هاذشي مزيان حتى يولي الخليط بحال الكريمة وكنزيد معلقة صغيرة الكليكوز باش يجي الصابلي مقرمش

وكنبقى نضيف فالدقيق حتى كتجمع العجين ما قاصحة ما جارية معروفة عجينة الصابلي كيف كتكون

وكنغلف العجين وندخلو للثلاجة نصف ساعة يرتاح

من بعد كنطلقو سمك متوسط وكنقطعو باي قطاعة بغيتو

وكنحط الصابلي فوق لاطة لي مفرشة بورق الطبخ ضروري باش النوكا ما تلصقش منين ندخلوها للفران

ملي كنسالي تشكيل الصابلي كناخد قفالة صغيرة كنقطع بيها الصابلي من الوسط هكا باش نخوي العجين من الوسط ونلقى فين ندير النوكا كيف ما موضح فالصورة

وكنخلي العجين يرتاح وكنحضر النوكا

طريقة النوكا:

40 غ زبدة حيوانية 40 غ السنيدة و 40 غ الكليكوز كنحط كلشي فوق نار متوسطة مجرد كيبدا الخليط يغلي كنضيف ليه 80 غ اللوز كونكاسي وكنحرك الخليط ونطفي عليه نخليه يدفى شوية

وكناخد منو كنشكلهم على شكل حبات يكونو قد الحمص ونحطها فوسط العجين لي خويت وكندخل الصابلي للفران لي مسخن ما قبل والعافية متوسطة كيكون شاعل غير التحت يطيب ويتحمر عاد كنشعل الفوق وبالصحة والراحة

هذه الوصفة هي من ghita_adam09 اضغطي هنا لزيارة حسابها

ترك تعليق