أطباق تقليدية

طريقة عمل سفة برستيج

 
طريقة عمل سفة برستيج :

مقادير تحضير سفة برستيج :

300 غ الشعرية السفة ممكن اقل او اكثر حسب افراد الاسرة دهنتها بالزيت ورديتها تفور فالكسكاس مجرد طلعات فيها الفورة الاولى ومن كل الجهات حسبت 5 دقائق وحيدتها

حطيت الكسكاس فالكصعة وخويت عليها داك الماء لي مغلي فالبرمة هزيت الكسكاس درتو فوق اناء يستقطر ورديت داك الماء فالبرمة ورديتها فوق البوطة

خويت السفة فالكصعة وبقيت نحرك فيها بالمعلقة حتى تشربات الماء ونشفات وعاد رديتها تفور للمرة التانية خليتها حتى تشوكات مزيان

وتاني درت ليها نفس العملية خويت عليها شوية من الماء لي فالبرمة وهزيت الكسكاس وخويت الكصعة تاني من الماء رديتو فالبرمة

خويت الشعرية ديالي فالكصعة وبقيت نحرك فيها حتى كتبان لي نشفات
ظفت الملح وزدتها نصف كاس عنبة ماء من الروبيني حركتها وخليتها تشرب منين تشربات ونشفات كنبقى نحل فيها بالفورشيط

ورديتها تاني تفور خليتها تاني حتى تشوكات كلها وحيدتها خويت عليها الماء تاني وهزيت الكسكاس يستقطر وخويت الكصعة من داك الماء وحطيت الشعرية وانا كنحرك فيها حتى كتبان لي نشفات

ظفت ليها كاس حليب ومعلقة صغيرة عامرة ديال الزبدة ما حداها مزال دافية وبقيت كنحرك فيها حتى دابت الزبدة وخليتها تشرب السوائل صافي وبقيت نحل فيها بالفورشيط راه كتجي مفروزة وحبة على حبة

طريقة تحضر الزبيب لتزيين سفة برستيج :

خديت الزبيب غسلتو ودرتو فكاسرول ضفت ليها كاس عنبة ماء ومعلقة ك زيت المائدة شوية الملح وراس معلقة صغيرة من الابزار الخرقوم السكينجبير

وحركت الكل وحطيتو فوق عافية متوسطة مع التحراك المستمر مرة مرة حتى قرب يشرب الماء

وظفت معلقة كبيرة سكر لي كيبغي الحلاوة يدير اكثر ونصف ملعقة صغيرة القرفة وخليت الزبيب يتعسل ومنين تعسل درتو يستقطر

طريقة تقديم سفة برستيج :

خديت اطار دائري حطيتو فوق الطبسيل وكنحل السفة ديالي ونحطها فالطبسيل حتى كملت السفة لي عندي وحيدت الاطار

حطيت فوق منها المشماش لي معسل ودايرة فوقو كركاع وفالوسط درت الزبيب وزينت بالسكر الصقيل واللوز لي محمر بقشورو ومطحون والقرفة وشوية من الورد البلدي كإضافة

وبالصحة والراحة

هذه الوصفة هي من ghita_adam09 اضغطي هنا لزيارة حسابها

ترك تعليق