فقاص مغربية بلدي
اليوم نتقاسم معاكم هاد الفقاص اللي كيجي غزال بلا مايتشقق في الفران ولا يتهرس في التقطاع كيجي لذيذ بزاف
مقادير فقاص مغربي بلدي :
8البيضات
2كيسان سكر ما يعادل زلافة معامراش
2كيسات زيت مايعادل زلافة ماعامراش
كاس إلا ربع حليب (اللي كيبغي الفقاص هشيش ممكن يستغنى عليه أو ينقص من الكمية)
كيس سكر بنكهة زهرة البرتقال أو الفانيليا
النافع وحبة حلاوة 3ملاعق كبار أو حسب المتوفر
كاس زنجلان محمر ومهرمش
اللوز حسب المتوفر تقريبا كاس ونص يكون مقطع على جوج أو أكثر أنا مكنرقدوش في الماء غير كنغسلو صافي باش مابجيش لاوي في الفقاص
دقيق حسب الخليط
2أكياس خميرة الحلويات
ملعقة كبيرة قرفة (اختيارية)كتعطي لذة غزالة
طريقة تحضير فقاص مغربي بلدي :
في خلاط كهربائي نوضع البيض،السكر،الزيت،الحليب،الفانيلا نخلطهم جيدا ممكن تخلطو غير في قصرية كيبقى الخلاط طريقة أسرع وأسهل
من بعد نصب الخليط في قصرية نضيف النافع وحبة حلاوة يكونو مصهدين ومطحونين وكذلك الزنجلان ،القرفة واللوز
ونبدا نضيف الدقيق بشوية مع الخمارات وأنا كنجمع حتى يتجمع ليا الخليط تقريبا هز ليا كيلو و300غرام كتبقى الكمية حسب نوعية الدقيق وحجم البيض
المهم تبقا العجينة مرخوفة شوية متقصحوهاش باش ميتشققش ليكم في الفران
من بعد نقسمو كويرات ونشكلو حرابل طوال نوضع كل حربول في صفيحة الفرن ندهنهم بصفار البيض مع قهوة سريعة الذوبان أو الكاكاو ممكن تعملو حتى الماء مع الكاكاو عوض صفار البيض
نشرطهم بالشوكة وناخد إبرة معقمة نتقب بها الحرابل كاملين
وندخلهم الفران يكون بارد حتى ندخل الصفيحة عاد نشعلو ندير العافية مهيلة نتركو حتى ينضج منخليوهش يتحمر نقيصوه من الجوانب غير يبان لينا طاب صافي نزولوه (إلا خليتوه حتى تحمر شوية راه غيتهرس ليكم في التقطاع)
نغطي الفقاص بمنديل نتركو تقريبا ساعتين أو حتى يبرد من بعد ناخد سكين حاد وتقطع بيه الفقاص
ونستفو في الصفيحة نسخن الفران مزيان وندخلو،العافية من الفوق تكون مهيلة حتى يتحمر نقلبو يتحمر من الجهة الأخرى ونقدمو بالصحة والراحة
